🌼🌼🌼गणपतीचें निर्गुण अथवा तात्विक व विश्वव्यापक स्वरूप :- 🌼🌼🌼

सर्व सिद्धिंची फळें देणारा, अज्ञानाचें आवरण दूर सारून भ्रम नाहीसा करणारा, आणि मूर्तिमंत ज्ञान असणारा ओंकाररूप जो गणपती त्याला मी नमस्कार करतो. गणपतीनें माझे अत:करण आंतबाहेर व्यापून टाकावें. तेथें त्यानें कायमचें घर करुन राहावें, आणि आपल्या कृपादृष्टीनें पाहून मला मुक्याला ग्रथं सांगण्याचें सामर्थ्य द्यावें. त्याच्या कृपेच्या सामर्थ्यानें भ्रम व अज्ञान याचें आवरण विरुन जातें आणि सारे विश्व गिळून टाकणारा काळ आपला गुलाम बनतो. अचानक त्याची कृपा झाली कीं, बिचारी संकटें भयानें थरथर कापू लागतात. इतकेंच नव्हे तर केवळ त्याच्या नामस्मरणानें तीं कोठल्या कोठें नाहींशीं होऊन जातात.

यासाठी गजाननाला विघ्नहर म्हणतात. जगांत ज्याला कोणि नाही त्याला तो आश्रयस्थान आहे. विष्णु, शंकर, वगैरे देव त्याला नमस्कार करतात. जगांत जें उत्तम आहे त्याला तो सांठा आहे. त्याला नमन करुन कोणतेही काम सुरुं केल्यास ते सर्व बाजुनें यशस्वी होतें. त्या कामांत संकटे, अडथळें व कटकटी निर्माण होत नाहींत.

गं गणपते नमः